वाढत्या कोरोनामुळे माजी आमदार पाटील यांनी व्यक्त केली चिंता ; मंत्री टोपेंना पत्र लिहुन केली मागणी

करमाळा समाचार 

करमाळा तालुक्यात कोरोना रूग्णांची संख्या दिवसेंदिवस वाढत असून कोरोनामुळे मृत्यू झालेल्यांची 100 च्या घरात गेली आहे असे घडत असतानाही करमाळा तालुक्यात एकही व्हेंटिलेटर बेड उपलब्ध नाही, शिवाय रेमडिसिव्हर इंजेक्शन उपलब्ध होत नसल्याने रुग्णांना जीव गमावण्याची वेळ आली आहे. त्यामुळे प्रशासनाने करमाळा व जेऊर येथे व्हेन्टिलेटर बेड सह सर्व सुविद्यानीयुक्त असे कोविड सेंटर सुरू करावी अशी मागणी शिवसेनेचे माजी आमदार नारायण पाटील यांनी केली आहे.

याबाबत आरोग्यमंञी राजेश टोपे,तसेच जिल्हाधिकारी व तहसीलदार यांना निवेदन दिलं आहे या निवेदनात म्हटले आहे की , करमाळा तालुक्यात कोरोना रूग्णांची संख्या दिवसेंदिवस वाढत आहे. दररोज सरासरी 70 ते 80 कोरोना रुग्ण सापडत आहेत. कोरोना वरील उपचारासाठी होणारा खर्च गोरगरिबांना परवडणार नाही. कोरोना रुग्णांचा वाढता आकडा लक्षात घेता करमाळा तालुक्यात करमाळा व जेऊर येथे उपजिल्हा रुग्णालये असुन येथे स्वतंत्र कोविड सेंटर उभारण्याची गरज आहे .या कोविंड सेंटरमध्ये व्हेंटिलेटर बेड, रेमडीसिव्हर इंजक्शन , ऑक्सिजन बेड याची व्यवस्था होणे गरजेचे आहे.
तालुक्यातील कोरोना रुग्णांचा वाढता आकडा धोकादायक असून वेळीच याला आवर घातला नाही तर भविष्यात तालुक्यातील कोरोना रूग्णांची संख्या मोठ्या प्रमाणावर वाढेल, हा आकडा वाढत गेला तर कोरोना रुग्णांवर उपचार करणे अवघड होऊ शकते.

त्यामुळे कोरोना रुग्णांवर उपचार करण्यासाठी आवश्यक यंत्रणा तात्काळ सुरू करणे गरजेचे आहे. करमाळा तालुक्यात एकही व्हेंटिलेटर बेड उपलब्ध नाही. कोरोना रूग्णांना व्हेंटिलेटर लावण्याची वेळ आली असेल तर त्यांना तालुक्याबाहेर पाठवावे लागत आहे सध्याच्या परिस्थितीत बाहेरदेखील व्हेन्टिलेटर बेड उपलब्ध होत नसल्याने रुग्णांना प्राण गमवावे लागत आहेत. त्यामुळे प्रशासनाने तात्काळ करमाळा तालुक्यात व्हेंटिलेटर बेडची व्यवस्था करणे गरजेचे आहे .

तालुक्यात रेमडीसिव्हर इंजेक्शन मिळत नसल्याने करोना रुग्णांच्या नातेवाईकांना रेमडिसिव्हर इंजेक्शनं मिळण्यासाठी पुणे, बारामती , अहमदनगर, सोलापूर या ठिकाणी धावाधाव करावी लागत आहे. याठिकाणी जाऊनदेखील इंजेक्शन उपलब्ध होत नसल्याने करमाळा तालुक्यात उपचार करणारे डॉक्टर देखील हतबल झाले आहेत. सध्या तालुक्यात दोन कोविड केअर सेंटर सुरू आहेत. माञ कोरोनामुळे जास्त ञास होत असलेल्या रूग्णांसाठी सर्व सुविद्या असलेले कोविड सेंटर नाही. त्यासाठी दोन कोविड हेल्थ सेंटर उभी करावीत.
त्यामुळे करमाळा तालुक्यात वेळीच व्हेंटिलेटर बेड सह कोविड सेंटर सुरू करणे गरजेचे आहे. तसेच रेमडिसिव्हर इंजेक्शन व ऑक्सिजनचा आवश्यक पुरवठा करणे गरजेचे आहे.